Historia do Huracán de Zamáns

Este club vigués deu os seus primeiros pasos nos anos trinta, impulsado por un grupo de emigrantes retornados dende Arxentina. Estiveran en Bos Aires, nun barrio onde todos animan ao Club Atlético Huracán, de aí que cando regresaron a Galicia e comezaron a darlle ao balón escollesen ese nome en homenaxe ao club do que eles tamén se sentiran parte a case 10.000 quilómetros da casa.

Aínda que disputaron con frecuencia partidos amigables dende a década dos trinta anos despois, en 1967, 4 veciños de Zamáns: Rudesindo Alonso Martínez “Sindo”,Armando Oitavén Bartolomé, Honorio Oitavén Bartolomé e Orindo Costas foron os que Federaron o primeiro equipo de fútbol da historia de Zamáns: O “C.F. O Huracán de Zamanes”. O equipo sénior do Huracán de Zamáns —que é a parroquia máis pequena do concello de Vigo, cuns 1.000 habitantes— competiu de xeito oficial entre 1967 e 1989, converténdose no primeiro equipo de fútbol do lugar. O Huracán completou tempadas históricas, como a 1975/76 (na imaxe inferior), cando remataron a liga como campións da segunda división comarcal sen perder un só partido.

Durante os seguintes dez anos, entre 1989 e 1999, o Huracán foi alternando tempadas de inactividade con outras nas que contou con equipos de base, pero a chama foi apagando aos poucos. Agora, case un século despois de que o fútbol chegase a Zamáns dende Arxentina, a ilusión e o Huracán están de volta con moita forza.

Equipo de fútbol fundado federativamente en 1967

Retomando actividade en 2024

En Zamáns hai tantas ganas de fútbol que o Club Atlético Huracán iniciou a pretempada . Xa temos todo listo para saír a competir na Terceira Futgal. “Queremos ver como se nos da, porque hai xente que leva tempo parada”.

O que está claro, é que ningún rival, nos gañará en ilusión. “O obxectivo é que o proxecto vaia para adiante, que os xogadores sexan comprometidos e poder competir pasándoo ben e facendo que os veciños o pasen ben e se sintan orgullosos”, esta iniciativa non só persegue obxectivos deportivos, senón tamén sociais.